Kanser

Sari-saring mga sakit, kaawa-awang bayan
Hanap ay lunas para sa dumadaing na lipunan
Nawawalan na ng pag-asa, dumidilim ang isipan
Iisa lang ang pinagmulan- mikrobyo ng kahirapan.

Nandiyan ang trangkaso- iligal na trabaho at pandaraya
Pinapasok lahat, magkalaman lang ang mga sikmura
Mga nakakapit sa patalim, pati pagkatao ay sinira
Inutil sa pamahalaan, walang tulong sa mga maralita.

Nandiyan ang kanser- mga bisyo at seksuwal na imoralidad
Panandaliang lunas, maikling kaligayahan ang hangad.
Kawalan ng sapat na pinag-aralan, lahat ng wasto ay binaliktad
Sa lansangan ng kasalanan, kasama barkadang huwad

Naputol ang mithiin sa madugong eksena
Pag-asa ng pagbabago, sumabog lang sa lupa
Pangarap ng isang buhay, pinutol at binasura
Dapat isipin ng lahat, laging may bukas pa.